الجمعة، أبريل 03، 2009

تاج الصراحة

تاج انا جالى تاج من ابو العريف صديقنا العزيز

وتحت التهديد والضغط الارهابى من الحرامى اللى كان حد مش فاهم حاجة وبقدرة قادر كده اتحول الى ابو العريف اضططرنا نحن ً بس خلاص ً بالاجابة عن الاسئلة اللى جايه
اسمى: بس خلا ص اعرفكم بنفسى اكثر زى عمنا صلاح جاهين ما قال
أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي
اسم مشهوره بيه: اسماء كثير جدا احبهم الى قلبى رضوىاو( ام هند )


سنك : هسيب برضه عمنا صلاح جاهين يرد المره دى
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبى
مجال دراستى : كتييييييير انا درست فى اكثر من مجال لدرجة ان الناس اللى حوليا بيقولوا لى انتى غاويه وجع قلب


درست اتصالات الكترونية وتكنولجيا -درست ادارة اعمال - حتى فى الثانويه درست علمى علوم ورياضة وادبى شفتوا بقا غاوية وجع قلب ورغم ذلك مؤمنه جدا بأن العلم فى الراس مش فى الكراس علشان كده مخى محشى حاجات كتييييييييير .........

اسم مدونتى : ووووووووووولايهمك لصاحبتها بس خلاص
الصورة اللى فى مدونتى بتعبر عن ايه :
صورة بنوته حلوة شقيه بتفكرنى بأيام الطفولة بينى وبينكم انا كنت طفله شقيه جدا جداا
هل فكرت فى اغلاق المدونه :
لحد دلوقتى لا .. لكن لو لحظه حسيت اننى فقدت حب الناس هقفلها فورا لان اكثر حاجة بتسعدنى هى حب الناس باحس ان دى ثروة لايمكن تعويضها


لو حد كتب تعليق مش مناسب او تعليق خارج لا سمح الله:

طبعا هيكون مصيره التجاهل والحذف وبعدين هقعد افكر بينى وبين نفسى ليه صاحب التعليق كتب كده......؟؟؟
اسوء مدونه: لسه مادخلتهاش ولو دخلتها صدفه هخرج بسرعه واكفى على الخبرماجور


هيحصل ايه للايميل بتاعك لما تموت...؟

طبعا مش هلاقى رد اجمل من رد ابو العريف هستلفه منك ياهندسه


ما يولع اعمله ايه
ههههههههههههههه
انا هبقي فاضي للاميل

اديت الباسوورد بتاعك لحد ...؟
ساعتها مش هيبقا با ص ووورد هيبقى باص وسط البلد


السفربالنسبه لك ايه ...؟



طبعا زمان قالوا للسفر سبع فوائد وده شئ حقيقى اما من وجهة نظرى لو عايز تتعرف على شخصية انسان صاحبه فى السفر.. باحب السفرواعشقه لكن بخاف من الغربه

المود بتاعك ؟
طبعا ده سؤال صعب جدا وممكن يخلينى ما اعرفش اعدى الامتحان ده... امممم !!!! السؤال ده بيفكرنى بأغنيه اسمها ساعات ساعات يعنى ساعات اكون مجنونه وثائرة وساعات ابقى هادية ومتأمله وطبعا اكتر كلام بلاقيه بيعبر عنىفى اغنيتين بحبهم جدا اغنية ايمان البحر درويش واسمها( عرفتينى) وكمان اغنية المطرب السعودى محمد عبده اسمها( مجموعة انسان) ياريت تسمعوهم هتلاقونى باسمعهم معاكم عشان نتعرف على بعض اكتر .


بتعملى ايه فى وقت فراغك ؟
ماعنديش فى الوقت الحالى والحمد لله وقت فراغ ولكن لو لاقيت وقت فراغ بناااااااااااااااااااام الله عليك يانوم... يانوم يانوم
اقولكم بقا حكمه على الماشى بتقول ( ماأحلى النوم لو استطعنا اختيار الاحلام )



الأكلة المفضله :
الأكلة المفضله طبعا كل نعم ربنا حلوة والحمد لله والاكله المفضله هى اللى بناكلها واحنا مع الناس اللى بنحبها بس بينى وبينكم بقا انا بموووووت فى الطعميه السخنه

الصفات اللي ورثتها عن والدى:
رحمه الله والدى هو مثلى الاعلى كان استاذا بالجامعة وكان يكتب الشعر والادب وكان يجيد اكثر من لغة وكانت شخصيته قويه جدا.. واذا تركت لنفسى العنان سأكتب فيه دواوين رحمه الله توفى فى سن مبكره جدا .
الصفات اللي ورثتها عن والدتك ..؟
امى شخصيه عنيده جدا شخصيتها قويه وذات عزيمه واصرار لاتسطيع ان ترجعها عن شئ اقتنعت به
اراها فى نظرى اقوى شخصيه قابلتها ....ولقد ورثت عنها الاصرار ولكننى حاولت ان اداوى نفسى من العناد .
اكثر ست اشياء اكرهها : طبعا اولهم ابو العريف اللى ورطنى فى هذا التاج وخلانى قاعده عرقى مرقى زى مابيقولوا لا طبعا ابو العريف ده مدون محترم جدا وانا اكن له كل التقدير

ولكننى لن ادعى المثاليه بس فعلا اكثر شئ اكرهه فى حياتى الكذب ثم الكذب ثم الكذب ثم الكذب
لان الكذاب شخص جبان وانا اكره الجبن واذا كنت جبان ستصبح منافق وانا اكرهالنفاق وكفايه كره بقا نرجع لباقى الاسئله
شخصيتك نوعها ايه....؟ ماحدش يقدر يحكم على شخصيته ولكن المحيطين والمتعاملين مع الانسان هما اللى يقدروا يحكموا وممكن تعرفوا شخصيتى من اجاباتى مثلا وانا كمان جاوبت فى سؤال المود بتاعى....
لماذا دخلت عالم التدوين ...؟ ارشدتنى اليه صديقتى ماعلينا ولاقيته عالم جميل جدا بس هى جابتنى هنا وخلعت .. بحبها جدا وبحبكم كلكم ...
اجمل كلمه اتقالت في وصف مدونتك.....؟طبعا اى حد بيكتب عندى تعليق باحس ان هو اجمل كلمة اتقالت لانه بيعكس وجهة نظر تستحق التقدير ولكن صديقى العزيز صاحب مدونة هو مش نو كتب عنى بوست جميل جداسمه (بس خلاص كلها اخلاص )ا ارجو منكم انكم تزوروا مدونته وتقروه اعتز جدا بهذا البوست واعتزبصاحبه

اهميه التعليق بالنسبه لى

: طبعا النعليق شئ مهم جدا وهو ده اللى بيدى للمدونه روح وبيعكس احساس الناس بيك وكما ن بتقدر تقيم نفسك من خلال التعليقات وكمان بتتعرف على شخصيات الناس من خلال تعليقاتهم وطبعا لتعليق هو رمز التواصل بين المدونين

احسن بوست كتبته :

لسه ماكتبتهوش لانى دايما عندى الشعور بأن بداخلىالكثير وباحاول اخرج ده فى البوستات ولكننى فى النهايه اشعر بالعجز عن التعبير
افضل بوست قرأته ..
.؟ليه بقا السؤال اللى يزعل ده عايز تشعل الفتنه بينى وبين حبايبى يابو العريف .. كل بوست قريته اضاف الى الكثير فعلا بدون مجامله بادخل بوستات باموت فيها من الضحك والاقى الهم من قلبى اختفى وكمان بوستات حالمه تطير بيك فوق السحاب وبوستات كلها ثقافة ووعى وتنم عن شخصيات محترمه وعاليه الثقافة بالاضافة الى مدونات الفنانين والرسامين اللى بتلاقى عندهم الراحة النفسية وممكن تقرا شخصيتك فى لوحاتهم طيب ازاى بعد كل الجمال ده تقدر تميز مين افضل

فى النهاية احب اختم كلامى بكلمتين من عجايب عمنا صلاح جاهين لوسمحتولى
ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش
وعجبى
............
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر

امرر التاج لمين

بصراحة دى تجربة صعبه جدا لا اريد ان افرضها على حد معين لكن اى صديق يحب يعرفنا اكثر عليه ويعتبر دى دعوة مفتوحة لاحبابى اللى يحب يتفضل ويبقى على رأى المثل جنت على نفسها براقش