السبت، نوفمبر 08، 2008

عندما سألت شهرزاد

من الشخصيات النسائية التاريخية التى اعجبتنى واثرت فى لدرجة انى عملت ايميلى الخاص جدا باسمها هى شهرزاد ...تلك الفتاة البسيطة التى استطاعت بكل اسلحة المرأة ان تحتوى هذا الملك المغرور الجبار وتجعله كالطفل الوديع بين يدييها ينتظر ويترقب نهايات لقصصها التى تعمدت الاتنهيها حتى لاتنتهى حياتها واخذت تأخذه من قصة الى قصة ومغامرة الى مغامرة حتى نسى عقدته الازليه وهى قتل النساء انتقاما لكبرياؤه وكرامته ..واصبحت هى مليكته ومليكه الدنيا آن ذاك ( وقلت فى نفسى يابختك ياشهرزاد يابنت الايه )

احترت واحتار دليلى معاكى ياشهر كيف استطعتى ذلك هل بجمالك فالكون ملئ بالجميلات ولم يستطعن فعل مافعلتيه انت هل ذكاؤك هل مكرك هل حنانك هل ..هل ....



وبعدين قلت لنفسى زى عبد الحليم باشا حافظ انا بافكر ليه وهتعب روحى ليه ... قلت أسالها ...

وفى ذات ليله اخذت سفينتى الخياليه وذهبت بلاد تشيلنى وبلاد تحطنى لحد ماوصلت لهناك وباعجوبة شديده استطعت ان اتخفى من مسرور افندى السياف

ووقفت وراء الستار لارى ماتفعله هذه الداهية الجميلة واصف ماتفعله لكل سيدات الكون ليتحول كل رجل فى بيته الى شهريار... يعنى ملك متوج بس مضحوك عليه ...

وبعدين سمعت شهريارحائرا يسألها من انت بالله عليكى خبرينى (قلت فى نفسى ياربى... باين عليه هو كمان احتار فيها )

فقالت له :

اتعرف من انا ؟؟؟

انا التى تبحر فى دنيا هواك

انا التى لاتعرف سبيل الى سلواك

انا التى تسمو لنيل رضاك

يامليك الارض لم احب سواك

وقلبى لم يبارك هواً كما بارك هواك

يامن باركته الدنيا وعلت تبعا لعلاك

فلا استطيع عصيانك بعد ان رأيت هداك

وبعدين بدأت تقص عليه حكاويها الجميله لحد الراجل ماراح فى النوم ياعينى زى الطفل المسكين

اللى وراه مدرسة الصبح بدرى....وانصرف مسرور وهوغضبان يزأر لان الصدا قرب ياكل سيفه من البطاله المقنعه .


وخرجت شهرزاد وهى ماشيه كده على مهل بفستانها الجرجار المقصب الجميل وكلها خيلاء وتيه ودلال

قلت الحقى يابت بسرعة اسأليها

ناديت عليها وقلت :

شهرزاد ايتها الاميرةالساحرة خبرينى بسرك فأنت ماهرة

فقالت سائلتى :

احقا لاتعلمين ام انك ماكرة..

قلت لها :

لااعلم سرك وبت ليلى ساهرة

قالت :

مليكك ينوى قتلك مثلى باكره

قلت لها :

قتلنى مليكى وجراحى غائرة

تمتمت :

ياللمسكينه فبالدموع عينك زاخرة

هونى عليك فسيوف الملوك جائرة

ولما استسلمتى وانتى ضد الملوك ثائرة ؟

قلت لها ليتنى مثلك على العصيان قادرة

ونظرت الى نظرة عميقة مؤنبةٌَُ ساخرة

ولم تجبنى وتركتنى فى سؤالى حائرة

وقبل مسرور مايشوفنى..

خرجت وانا لربى حامدة شاكرة....

وقبل ماتبقى حياتى بس خلاص .....


هناك 27 تعليقًا:

الكحيان يقول...

ماشاء الله عليك يابس خلاص .. رحلة رائعة عبر آلة الزمن إلى شهرزاد، باسلوب لطيف ظريف لا يخلو من الفكاهة والمفارقة التي تجمع بين أمور لا تجتمع... وكمان أسلوب شعري رقيق، وطريقة عرض حيوية ولذيذة ... الله الله جميل صنيعك أيتها الأديبة الأريبة .

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

lonly Kuwaiti يقول...

شهرزاد هي مثال للمرأه الذكيه ... مثال للأنوثه ومثال لكل ما يتمناه الرجل من المرأه...
تحياتي الى كل الشعب المصري ...
اتمني ان اقضي اجازتي القادمه عندكم...

فركشاوي ..ناوي يقول...

وتمضي شهرزاد في سردها المعتاد والحمار لها منقاد ...لا يعصي لها أمرا فقد اسكرته بلا خمرا ...ونام وصحي عينيه حمرا...ينادي علي مسرور بكل غرور ...أقتلها لتكشف المستور ...بس خلاص مش رايحه اقول غير العقول ...وآكل فول مع العجول ...بس خلاص

بس خلاص ... يقول...

أ. كحيان
شكرا على تشجيعك لى فى بدايتى كمدونة متواضعة جدا جدا
واستفدت كثيرا من تحليلك الذى ينم عن شخصية واسعة الثقافة .


م. الحسينى اهتمامك بقضايا الوطن مجهود تشكر عليه وجعله الله فى ميزان حسناتكم


الكويتى الوحيد ... شكرا على تشريفك مدونتنا ونعدكم بالتواصل

..فكشاوى ناوى ... شرف عظيم وكبير ان تزورناوتقرأ ماكتبنا.. بس على فكرة كيلو الفول بقا بالشئ الفلانى يعنى مش اى عجول تقدر تاكله دلوقتى .....لاتحرمنا الزيارة والتعليق خفيف الدم عميق المعنى

fashkool يقول...

بس خلاص الجميله .. شهرزاد من الشخصيات التى دوخت المحللين لشخصيتها .. فهى الانثى الجميله وهى الانثى الماكره وهى الانثى الماهره وهى الانثى المتحايله .. وبيقولوا يا بنتى الحاجه ام الاختراع وحياتها على المحك ففعلت ما فعلت وجنت ما جنته وجنبت بنات جنسها عقد الامير شهرياى .. وشعرك هايل واحساسك رائع .. يخرج من قلبك الى قلب قارئك .. نورتى عندى ويا ريت ما تبطليش الزيارات .. تحياتى

الحب كما ينبغى أن يكون يقول...

السلام عليكم

كلمات جميلة
بارك الله فيكى
أسأل الله العظيم أن تجدى ما تبحثين عنه
ولكن أخلصى النيه تصلى بأقصر الطرق

قلب مصرى يقول...

شهرزاد شخصية تستحق التأمل بالفعل فليست المقاومة فى الثورة فقط ولكن يمكن أن تكون فى الحيلة كذلك ويمكن أن يكون التمرد محسوب بدقة حتى تصل لمبتغاك
تحياتى

Beram ElMasry يقول...

الاخت الكريمة . بس خلاص
السلام عليكم ورحم الله وبركاته
سلمت من كل مكروه وشر
عرفت واصلحت الخطا وعنه اعتذر
اكيد فاميليا كويسه ، ولكن يعنينى قلمك الواعى فما خطه من عمل ادبى حقيقى يستحق امعان النظر ، بعيدا عن المجاملات وانه جامد قوى مثل هذه العبارات وتطييب الخواطرا
الجزء الخص بحوارك وشهرزاد سليم كله من ناحية الوزن والقافية عكس حوارها وشهريار ، والحكاية جميلة ولكن شهر زاد ليست شخصية تاريخية ولا حتى اسطورية هىبطلة حكاية فلكلورية
الحوار طويل ولا احب ان اثقل عليك لك تحياتى

كاميليا يقول...

الله عليكى

الفكرة فى قمة الذكاء ..

والحوار غاية فى الروعة

سعيدة انى اتعرفت عليكى


كل الاحترام

بس خلاص ... يقول...

السلام عليكم
استاذ فشكول حمد الله على السلامه نورتنا
تحليلك فى محله الحاجة ام الاختراع وعلشان كده تلاقى ان معظم الاختراعات اصلها المرأة لان حاجاتهم ما بتخلصش ولذلك احناالسيدات اساس المدنيه والتطور ...ولاعندك اعتراض قول بقا انك معترض ومش خايف من مسرور اللى جندته شهرزاد لصالحها
شكرا على قلبك الكبير وكلامك الجميل

بس خلاص ... يقول...

الحب كما ينبغى ان يكون ....شكرا على زيارتك وعلى نصيحتك المخلصة نتمنى ان تزورنا وتنورنا دايما

بس خلاص ... يقول...

قلب مصرى ...
-----------
ارق تحياتى وسعيدة جدا جدا لزيارتكم ارجو دوام التواصل .


الاستاذ الكبير جدا جدا بيرم المصرى
-----------------------------
شرف لى ان يقرأكلماتى شخصيه مبدعة مثلكم استفدنا الكثير من كتابات حضرتك
واشكرك على نقدك الموضوعى وتوجيهنا ....اتمنى لكم كل الخير

زهرة الكاميليا
-------------------
ارق ورده فى بستان المدونات ... كما سعدت بحروفك وكلماتك سعدت جدا بمرورك

klmat يقول...

الله على افكارك
شهرزاد بالاضافه الى جمالها.عقلها جميل وعرفت من اين تؤكل الكتف وعدم استسلامهابسرعه ورغبتها وتمبزها نفعها بس ماشاء الله على اسلوبك وشعرك جميله اوى
دمتى بكل خير

ياسر حسين يقول...

ده أنتي أبحرتي في عالم الخيال ودخلتي في أعمق الاعماق ... ذكاء شهر زاد أنها داعبت الطفل اللي جوا شهريار .. على فكرة كل رجل بداخله يوجد هذا الطفل اللي بيحب اللعب والحواديت
:)

خالص تحياتي

بس خلاص ... يقول...

أ. ياسر
فعلا شهرزاد عرفت ان شهريار هو طفل كبير بدليل انها اسرته بحواديتها التى استمرت الف ليله وليله دون ملل ولاكلل ...
بس هل شهريار 2008 عنده وقت يسمع حواديت شهرزاد ...

صاحب المضيفة يقول...

جميلة تلك الكلمات ذات الايقاع


شكرا لتشريفك لي هناك وشكرا لاتاحة الفرصة لي للمرور هنا


بوركت وعوفيت

fashkool يقول...

بص يا بس خلاص
طبعااااا انا كنت بحقد عليه .. يعنى اضحك عليكى هو يعنى قاعد يغازل فى مزه زى القمر وانا الحاجه بتاعتى تقول لى مالكش لازمه .. اما الحب عن طريق الودان ما تفهميش غلط عشان كان واحد بيتكلم والتانى يسمع .. آدى يعنى الحكايه .. ماشى يا ستى .. هو انا اقدر اقول على ام اسامه كتر خيرها .. وطبعا كان فيه كورنيش وترمس وضره مشوى وكان فيه الاورمان وحديقة الاندلس وكازينوا النيل وكنا بنشرب الشاى بـ 35 قرش دى الوقت يقول لك فول يا بيه ويجيب لك الشاى وحته .
جاتوه زى الزفت وتدفع 35 جنيه.. يا بلاش.. تحياتى

رابطة هويتي اسلامية يقول...

السلام عليكم ورحمة الله وبركاته
لقد تم بتوفيق من الله اختيار أعضاء المجلس الاستشاري
وهم
كلمة حق ( أبو خيري )
جبهة الدفاع عن العمدة حزين ( أبو فاطمة )
أخر العنقود
غربتي
امة الله ( موناليزا )
هل تبحث عن السعادة (محمد غالية )
ملك المدينة
فتوح أبو المفاتيح
ولا يهمك ( بس خلاص )
ساعات ساعات
وليد الإسلام
إحنا ( زرزور )
نتمنى من الإخوة الأعضاء في المجلس الاستشاري تحديد الموعد لأول جلسة للمجلس الاستشاري في اقرب فرصة
طريقة التحديد
مثال
اليوم ما بين كذا وكذا الساعة ما بين كذا إلي كذا
نرجو سرعة الرد في أسرع وقت
مع الرجاء إعداد اقتراحاتك لورقة العمل في الجلسة

ما علينا يقول...

اممممممممممممممم

شيرشي لا فام

حتى من ايام شهريار والمرأة سبب المتاعب والبطالة

بذمتك مش المملكة كانت ماشية تماما التمام

ومسرور شغال
وكل يوم واحدة تطير رقبتها والحال عال

جات شهرزاد هانم هدت النظام
وحيرت نظام الانظمة في امرها

شهرزاد صحيح نموذج ذكى جداااا
المفترض تتبعه كل انثى

دا المفترض
دا طبعا لكل واحدة كل تركيزها وتفكيرها ازاي تروض البيه بتاعها
وتشد الطفل اللي جواه من ودانه

لكن الست امست في حاجة لمن يستخرج منها احساسها بانها امرأة
فلقد نسيت المرأة انها امرأة وارغمت الجميع على النسيان ايضا

فكيف لها ان تسلك درب شهرزاد قبل ان تستعيد كينونتها كامرأة

وليس كل رجل يمكن ان يأسره سحر ودهاء شهرزاد

فلا نبخس شهريار الوصف وعلينا ان نقول
انه كان ملكا نبيلا يعيبه عقدة خلفتها فيه احدى النساء بخيانتها

ولكن لو وقتى في ايد واحد يفتقد لمعانى الرجولة الحقة

فمهما تعمليله ولو حتى عملتى فيها

والكلام ينطبق على الجميع رجل وامرأة



بس قوليلي الاول
انى جبتى تاشيرة الابحار في خيالك دي منين
انت مش عارفة انه ممنوع ومحظور

وانك كدا بتعرضي نفسك للمساءلة



تؤ تؤ تؤ تؤ

كدا كدا
تخليني ارغى كل دا


بس خلاص كفاية عليكي كدا

وهابلغ عنك

شايفة عندك دعوة لمجلس وتنظيم وخليه

وحاجات كدا تودي الجونينة

كلكم كدا بتقولوا كلام يودي الجونينة

انا مش هاعرفكم تانى


عموما
ماعلينا

maiosha يقول...

بس خلاص

بجد من أجمل البوستات اللى قريتها وإستمتعت بيها جدا

واضح إن لقائك مع شهرزاد أثر عليكى لإنك عرفتى تشدينى لغاية أخر البوست ومخلتنيش أدى أمر لمسرور .. قصدى الماوس إنه يقفل الشاشة

إسلوبك فى الحوار جميل جدا.. وشخصياتك رغم إنها معروفة بس إنتى حطتيهم فى محيط تانى خاص بيكى

الملك وهو نايم زى الطفل اللى وراه مدرسة بدرى

ومسرور اللى مش طايق نفسه علشان الصدا هياكل سيفة

وصف جديد للشخصيات وفى نفس الوقت يفطس من الضحك

أشكرك على البوست الجميل ده .. وإن شاء الله مش هتكون أخر زيارة

تحياتى

بس خلاص ... يقول...

ماعلينا
بصى بقا.. انا عرفت الحقيقة شهرزاد جنبك ولاحاجة..لانك لوكنتى مكانها كان شهرزاد هيمشى فى الشارع يقول ..ياماناولى يانا...كان المفروض بدل ماسافر واتعب نفسى اسأل الاستاذه الذكيه ..الجبارة ..جبروت الثقة والجمال ماعلينا....
وبعدين انا واخده كارت جرين من حبيبتى ماعلينا وقالتلى روحى فى اى حته وووووووولايهمك

بس خلاص ... يقول...

صاحب المضيفة
نورت مضيفتى المتواضعة يابو الكرم
اتمنى دوام الزيارة

بس خلاص ... يقول...

ميوشة ياقمر
نورتى بجد بجد سعيده بيكى جدا ... والبج بوس عامل ايه له منى الف سلام ..ز
وحياتك ابقى هاتى معاكىالمرة الجاية زجاجة اسانس شاديه هديه عشانى

بس خلاص ... يقول...

أ. فشكول ... الرحلة الجايه انا مستنياك فى قطر الصعيد
هتعرفنى... هتلاقى حاجة كده ادامك ..... ولا اقولك خليها مفاجأةاحسن

SHEMOooo يقول...

السلام عليكم ورحمة الله وبركاتة..

في البداية احب اهنيكي علي الاسلوب الشيق والجذاب في عرض الفكرة ، من وحي الخيال..

خلتيني افكر بجد هي ازاي شهرزاد كانت كده، واحنا لية مش زيها.؟؟؟!!!!

بس عارفة لفت نظري قوي تعليق، ما علينا...
وخصوصا الوصف دة عجبني قووي بجانب اعجباي بالبوست بتاعك..
لما قالت.
"دا طبعا لكل واحدة كل تركيزها وتفكيرها ازاي تروض البيه بتاعها
وتشد الطفل اللي جواه من ودانه

لكن الست امست في حاجة لمن يستخرج منها احساسها بانها امرأة
فلقد نسيت المرأة انها امرأة وارغمت الجميع على النسيان ايضا

فكيف لها ان تسلك درب شهرزاد قبل ان تستعيد كينونتها كامرأة

وليس كل رجل يمكن ان يأسره سحر ودهاء شهرزاد

فلا نبخس شهريار الوصف وعلينا ان نقول
انه كان ملكا نبيلا يعيبه عقدة خلفتها فيه احدى النساء بخيانتها

ولكن لو وقتى في ايد واحد يفتقد لمعانى الرجولة الحقة

فمهما تعمليله ولو حتى عملتى فيها

والكلام ينطبق على الجميع رجل وامرأة"

بجد فعلا عندها حق قوووووووووووووي، وفعلا سؤال لازم كل بنت تسألة لنفسها ازاي شرهزاد قدرت تعمل ده، وده كان سؤالك في البوست، وكلام ما علينا رد علي التعجب اللي كان في سؤالك...

بجد بوست هايل وفكرة اروع..

نسيت اعرفك بيا
شيماء

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘